Re: Folklorea ikus-entzunezkoetan - kronika
Oier Araolaza <
oier@...>
2007-11-05 16:56:11 GMT
Aupa Xabier, Aritz eta konpainia. Ni ez nintzen jardunaldietan izan, baina zuek esandakoen harira okurritzen zaizkidanak:
Xabierrek:
> Nik uste, kamara batekin prozesu bat goitik behera jasoagatik, ezin dezakegula
> inolaz esan "errealitatea" bere horretan jaso dugunik. Gehienez ere
> errealitatearen zati bat jasoko dugu, zati txiki bat seguru asko;
Antropologia alorrean asko jorratu da gai hori, izan ere bilketa etnografikoa izan ohi da azterketa antropologikoen oinarrietako bat, eta tokian-tokiko bilketa lan horrek baldintzatu ohi du azken emaitza. Gaur egun nahiko onartua dago ez dagoela "errealitatea" bere horretan jasotzerik, errealitate bat dagoenik ere zalantzagarria baita. Aztergai dugun objektura hurbiltzerakoan nahi eta nahi ez gurekin daramatzagu gure ikuspuntua, hipotesiak, aurreko eskarmentuak, gure begirada eta kokalekua, eta horrek guztiak "konstruitzen" dugun "narrazioan" erabateko eragina dute. Eta bi hitz horiek funtsezkoak dira; "konstruitu" edo "eraiki" eta "narrazioa". Alegia, bilketa etnografikoa kontrukzio bat dela, aztergai hori gure parametroen arabera artikulatzeko darabilgun narrazioa.
Xabierrek:
> Telebistaren gaia ere atera genuen: ETB, berriro ere. Koldo San
> Sebastianek, ETBn zereginik ez dagoela esan zuen eta Internet dela
> etorkizuneko bidea.
Nik ez dakit ETBrekin zereginik ote dagoen, baina ados nago etorkizuneko bidea Internet delako horretan. Youtube, googlevideo, dailymotion, eta abarri esker ezagutzen ez nituen hainbat dantza ikusteko aukera dut gaur egun. Ez dira bideo landuak eta kalitatea txarra da (grabazioko zein erreprodukziokoa), baina ez dago produktu horiek eskaintzen dituen telebistarik, eta beraz, demaseko pagotxa da niretzat.
Telebista oso komunikabide garestia da. Internet ordea oso merkea da eta edozeini jarri dizkio eskura tresnak bere bideoen ekoizle izateko. Telebistak ere oso erne daude Interneti begira eta badakite beraien funtzionamendua egokitu beharko dutela datorren olatu berriaren arabera. Etorkizunean telebistak eta Internetek bat egin dezaketela uste dute hainbat adituk. Dagoeneko bide horretan daude batzuk. Adibidez, telebista asko hasi dira beraien programak beraien webguneetara zein Youtube eta mota horretako zerbitzarietara igotzen. Hori normalizatzen denean ordutegiek ez dute garrantzirik izango. Programa nahi duzunean ikusi ahal izango duzu. Beraz, berdin dio goizeko hiruretan edo arratsaldeko zortziretan eman programa, zuk nahi duzunean ikusiko duzu eta.
Xabierrek:
> Eta azkena. Ponentzia librean, rock giroko Bilboko makrofestibalaren
> irudiak erakutsi zizkiguten, eta gero "rock" jaialdiak "folklore" ote
> diren edo ez eztabaidatzen aritu ginen.
Folklore kontzeptuaren XIX. mendeko esanahiari lotzen bagatzaizkio nahiko zuzena iruditzen zait rock jaialdiak folklore direla esatea. Folk-lore literalki herri-jakintza bezala itzuliz gero, eta kontuan hartuta XIX. mendeko ikertzaile erromantikoek kontzeptu horren baitan herritar xeheen bizi-modu, ezagutza, adierazpide, errito eta festa-moduak bildu nahi zituztela, ba iruditzen zait gaur egungo gizartean, rocka eta beste hainbat adierazbide kontzeptu horretan oso ondo kabitu litezkeela. Beste kontu bat da XX. mendearen bigarren zatitik aurrera folklore kontzeptuaren balio semantikoa murriztu edo bideratu egin dela, eta gaur egun hitz horrekin kultura tradizionalararen adierazpenak identifikatzen ditugula. Baina horrek beste bide batera (hori ere interesgarria, aidanez!) garamatza, alegia, tradizioa definitzera... Portzierto, eta bide batez propaganda piska bat, hain zuzen ere folklore erakundeak izango ditu aztergai datorren astean Ortzadarrek Iruñean egingo dituen jardunaldiak.
Nik askotan esaten dut, zirikatzeko asmotan, baina sakonean hori sinesten dudalako, egungo gazteen artean indar gehien duen tradizioetako bat heavy metala dela. Badira 40 urte lehen heavy taldeak plazaratu zirela eta haiek jarritako ereduei zorrotz eta pasioz jarraitzen diete gaurko heavyek. Zalantzarik gabe esan dezaket heavy tradizioa euskal dantza baino askoz gutxiago aldatu dela azken 40 urteetan.
Ondo segi,
oier.
RSS Feed